ETZAKIT

Etzakit

BIOGRAFIA

Etzakit taldea triki-pop boladaren barruan sortu zen Hernanin. Erritmo latinoak, reggae-a eta bestelako eraginak islatu zituzten lehen diskoa atera ondoren, doinu rockeroagoak eta gitarreroagoak erabili zituzten bigarren diskoan. Xabi Solano trikitilaria izan zen taldearen ahotsa eta arima. 'Etzakit' izan zen taldearen lehen diskoa, disko koloretsu eta fresoa. Kaki Arkarazoren produkzio lanak, soinu eragingarriak ezartzeaz gain, taldearen esentzia azalera eraman zuen konposizioaren lerro nagusiak indartuz, kantuei bizitasuna emanez. Ondoren, 2000. urtean 'Goiz edo noiz?' izeneko bigarren diskoa argitaratu zuten. Xehetasunetan joria da diskoa. Bertan aurkeztu zituzten hamabi abestiak kalitate handikoak dira eta, gainera, entzuteko eta gogoratzeko errazak eta erakargarriak.

Bigarren lanean erritmo deigarriak, melodia iradokitzaileak, kantu freskoak eta moldaketa zainduak dira nagusi, eta hemen ere nabarmena izan zen Kaki Arkarazoren ukitua. Bigarren diskoa argitaratu eta han-hemenka aurkeztu ostean, taldea desegin egin zen beste zenbait egitasmotan murgiltzeko. esaterako, Xabi Solano kantaria 4 Itzal eta The Solano taldeetan ikusi dugu geroztik, baita Fermin Muguruzaren Kontrabandan ere.